ХВҚ Украинаға қаржылық қолдау көрсету үшін 1,3 миллиард доллар бөледі
Фото: Юрий Грипас / Reuters
Халықаралық валюта қорының (ХВҚ) Атқарушы кеңесі 7 қазан, жұма күні ХВҚ-ның жеделдетілген қаржыландыру механизмі аясында Украинаға 1,3 миллиард доллар бөлуді мақұлдады. Бұл туралы ұйымның сайтындағы мәлімдемеде айтылған.
Құжатқа сәйкес, қаражат еліміздің «төлем балансын қаржыландыруға байланысты барлық қажеттіліктерді қанағаттандыруға», атап айтқанда, азық-түлік секторына бөлінеді. ХВҚ бұл ақша «Украина кредиторлары мен донорларының одан әрі қаржылық қолдауы үшін ынталандырушы рөл атқарады» деп санайды.
Қор Украинаның жалпы ішкі өнімі 2022 жылы 35 пайызға төмендейді деп болжап отыр.
ХВҚ басшысы Кристалина Георгиева өзінің Twitter-дегі парақшасында Украинаға 1,3 миллиард доллар бөлінгенін растады.
Қыркүйек айында Украина премьер-министрі Денис Шмигал Украинаның Халықаралық валюта қорымен келісімге келе алғанын және биылғы жылы 2,8 миллиард доллар алатынын мәлімдеген. Ол сондай-ақ Украина Ұлыбританиядан қысқы кезеңге газ сатып алу үшін тағы 500 миллион доллар алатынын атап өтті.
