Жолдағы мұнай танкерлері. Мұрағат фото
Кипрдің қаржы министрі Константинос Петридес америкалық әріптесі Джанет Йелленмен сұхбатында Вашингтонның Кипр туы бар кемелерге ресейлік мұнайды үшінші елдерге тасымалдауға тыйым салу талабын қолдамады, деп хабарлайды Bloomberg ақпарат агенттігі.
Агенттік дереккөзінің хабарлауынша, АҚШ Ресей мұнайын үшінші елдерге тасымалдау үшін Кипр туын жамылған кемелерге тыйым салуды талап етуде. «Алайда Петридес көптеген басқа елдердің Ресейге қарсы санкциялар салмай жатқанын ескере отырып, мұндай қадамға алаңдаушылық білдірді», — деді дереккөз.
Йеллен сонымен бірге Петридеске Америка Құрама Штаттарының ресейлік мұнайға шекті баға енгізуге ниетті екенін айтты, делінген хабарламада.
Ресейдің Украинадағы арнайы операциясы басталғаннан кейін көп ұзамай Батыс елдері Ресей Федерациясына, атап айтқанда, Ресейдің энергетикалық ресурстарына қарсы санкциялар сала бастады. Санкциялардың алтыншы пакеті Ресей Федерациясынан мұнай импортына кезең-кезеңімен эмбарго енгізуді қарастырады. Тыйым тек теңіз арқылы жеткізілімдерге әсер етеді, ал «Дружба» құбыры арқылы келетін мұнайға шектеу қойылмайды. Болашақта Еуропа жетінші пакетті енгізуді жоққа шығармайды, оның ішінде ресейлік газды жеткізуге эмбарго болуы мүмкін. Ресей президенті Владимир Путин Ресейді тежеу және әлсірету саясаты Батыс үшін ұзақ мерзімді стратегия екенін және санкциялардың бүкіл әлемдік экономикаға ауыр соққы бергенін айтты.
