Ресей президенті Владимир Путин. Мұрағат фото
Ресей президенті Владимир Путин ТМД-ға қатысушы мемлекеттер азаматтарының зейнетақымен қамсыздандыру саласындағы құқықтарына кепілдік беру туралы келісімді денонсациялайтын заңға қол қойды. Тиісті құжат құқықтық ақпараттың ресми интернет-порталында жарияланған.
«2023 жылдың 1 қаңтарынан бастап келісімнің тоқтатылуын қамтамасыз ету үшін 2022 жылдың 30 маусымында келісімді денонсациялау туралы федералдық заңның күшіне енуі қарастырылған. Зейнетақы мәселесінің нәзік сипатын ескере отырып, Ресей Федерациясының келісімнен шығуы туралы шешім федералды заң түрінде ресімделеді », — делінген құжаттың түсіндірме материалдарында.
Осыдан отыз жылдан астам уақыт бұрын қол қойылған құжаттың ережелері ТМД елдерінің «мемлекеттердің зейнетақы жүйесінің идеологиясы мен іргелі қағидаттарына» енді сәйкес келмейтіні атап өтілген. Сонымен қатар, келісім бұл елдердің азаматтарына зейнеткерлікке шыққан кезде зейнетақы құқықтарын толық пайдалануға мүмкіндік бермеді.
Армения, Беларусь, Қазақстан және Қырғызстан сияқты бірқатар ТМД мемлекеттерімен жаңа келісімдер жасалды. Осылайша, ТМД азаматтарын зейнетақымен қамтамасыз ету жасалған жаңа шарттарға сәйкес немесе ұлттық заңнамаға сәйкес жүзеге асырылады.
