Bloomberg: Ресей мұнайдың эталондық сортын құруды жоспарлап отыр
Фото: Джоэл Анхель Хуарес / ZUMAPRESS.com / Global Look Press
Батыс елдерінің әлемдік нарықта осы шикізатты сатудан түсетін кірісті шектеу әрекеттерін бейтараптандыру мақсатында Ресей мұнайдың өзіндік эталондық сортын құруды жоспарлап отыр. Бұл туралы Bloomberg мәлім етті.
Агенттіктің хабарлауынша, Ресейдің негізгі министрліктері, мұнай өндірушілері және Орталық банк қазан айында ұлттық платформада мұнай саудасын бастауды жоспарлап отыр. Ресей 2023 жылдың наурызы мен шілдесі аралығында эталондық баға белгілеуге көмектесетін сауда көлеміне қол жеткізу үшін мұнай сатып алуға шетелдік серіктестерді тартады.
Аты аталмаған екі ресейлік шенеунік бұл жоспарды басылымға растады. Агенттік олардың «бастапқы кезеңде» екенін атап көрсетеді.
Бұған дейін Ресей Сыртқы істер министрлігінің ресми өкілі Мария Захарова G7-нің ресейлік мұнайға шекті баға белгілеу жоспары тек оның бағасының өсуіне әкелетінін атап өткен. Оның айтуынша, мұндай ниеттер «шытырман» және «нарыққа қарсы».
