«Известия»: жыл соңына дейін мейрамханалар бар мәзірінің 50% ресейлік алкогольден тұрады
Фото: Константин Кокошкин / Global Look Press
Жыл соңына дейін ресейлік мейрамханалардағы бар мәзірінің жартысы отандық алкогольдік ішімдіктер болады. Қазір бұл сусындар 10 пайызды құрайды. Бұл туралы «Известия» сала өкілдеріне сілтеме жасап хабарлайды.
Соңғы айларда ресейлік өндірушілермен келісім-шартқа отыру өсімі артты. Шетелдік алкогольді жеткізудің тоқтатылуына байланысты рестораторлар өз мекемелерінің мәзіріне отандық өнімдерді белсенді түрде енгізуде. «2022 жылы біздің мәзірде ресейлік гин пайда болды, сонымен қатар біз отандық шараптардың ассортиментін кеңейттік», — деді «Шоколадница» бас директоры Олег Подгорный.
Басылым сұхбаттастарының айтуынша, бүгінде мейрамханалардың бар мәзірінде Италия мен Ұлыбританияның сусындары басым болса, отандық алкогольдік ішімдіктердің үлесі артып келеді – соңғы уақытта ол орта есеппен 5-10 пайызға өскен. Жыл соңына дейін оның үлесі 50 пайызды құрайды деп болжануда.
«Рестораторлармен келіссөздер жүргізу оңайырақ болды. Олар тарапынан ресейлік өніммен танысуға деген құлшынысының жоғары екенін байқаймыз. (…) Қазір мейрамханаларға ұсыныс дайындағанда, бұл Proseco аналогы, ал бұл Небиолло сияқты және т.б. деп айтамыз, — деп бөлісті Fanagoria шарап зауытының бас директоры Петр Романышын.
Маусымның 28-і күні Smirnoff, Black Label, Johnnie Walker, Guinness, Baileys және Captain Morgan брендтерімен алкогольдік сусындарды шығаратын британдық Diageo компаниясының Ресейден шығатыны хабарланған болатын. Қысқарту процесі шамамен алты айға созылады.
